Morgunpósturinn snýr aftur

Posted June 20th, 2010. Filed under fótbolti HM 2010

Afsakið hlé…
Tveggja daga skammtur af yfirliti: Fór á Hvítu perluna enn og aftur í föstudagshádeginu (svar þeirra sem sátu fyrir aftan mig þegar þeir voru spurðir hvernig þeir hefðu fundið staðinn “Við komum nú bara alltaf hérna í hádeginu og svo var þetta allt í einu orðið að boltabar!”). Prófaði borgara, bara til að tékka, náði ekki steikarlokunni í gómsætleik. Dómarinn sá um Þjóðverja, með dyggri aðstoð þeirra sjálfra, Klose var sísparkandi í menn og með dómara sem búinn er að gefa fimm spjöld á hálftíma og þú sjálfur á gulu, þá er arfaheimska að sparka enn einu sinni aftan í mann. Rétt miðað við fyrri spjöldin en það fyrsta hefði átt að vera kyrrt í vasanum, þá hefði leikurinn verið betri. Gott mark hjá Serbíu, og flott markvarsla frá Stojković í vítinu (15 stig í Fantasy! Whoohoo!) Lélegt víti þó frá Podolski. Er þetta eðlilegri frammistaða frá Þjóðverjum.
Ekki var Slóvenía – Bandaríkin leiðindanúllnúll eins og ég spáði heldur stórgott 2-2. Bandaríkjamenn sýndu grimma baráttu til að jafna og hikstalaust hefðu átt að vinna. Að dómarinn skyldi dæma sóknarbrot þegar þeir skoruð það sem hefði átt að vera þriðja markið var stórskrýtið. Hann flautaði reyndar áður en skotið kom, en þá var fjórum mönnum haldið og togað í fimmta og það voru allt brot varnarmanna!
England – Alsír var svo þetta hrútleiðinlega núllnúll og ég nenni ekki að ræða það, slétt sama um hvað England er lélegt.
Laugardagur bjartur og fagur og ég gleymdi að blogga. Holland – Japan fyrsti leikur og Holland er Þýskaland. Knýr fram sigra með minnsta mun og lítilli fegurð. Japanir leyfðu þeim að hanga á boltanum fram að marki (þegar 23 mínútur voru liðnar höfðu Hollendingar verið með bolta 77% leiksins) en voru nokkuð ferskir í seinni hálfleiknum þó ekki tækist þeim að jafna.
Það var allt annað ástralskt lið sem mætti til leiks gegn Ghana en gegn Þýskalandi, komust yfir. En það er bannað að verja með hendi á línu eins og Harry Kewell komst að (umfjöllun hér um það hvers vegna þetta var hárréttur dómur skv. laganna hljóðan) og eftir það var þetta frekar dauft. Ghana missti sannarlega af tækifæri þarna og geta bara sjálfum sér um kennt að hafa ekki nýtt það, voru bara alls ekki nógu sannfærandi.
Fjörugur leikur kláraði daginn, Danmörk varð fyrsta liðið til að vinna eftir að hafa lent undir, slakar varnir, sending mótsins frá Simon Kjær og Afríkuþjóð fyrst til að detta úr leik.
Framundan: Slóvakía – Paragvæ 0-1; Ítalía – Nýja Sjáland 2-0; Brasílía – Kóte dívúar 2-0
Njótið sunnudagins.

Þetta var fínn dagur í gær! Chile skoraði reyndar ekki nema þetta eina mark, en spilaði alveg ágætan bolta og lofar góðu.
Svo kom að Spánverjum að setja líf í keppnina. Og það gerðu þeir svikalaust, ekki með flugeldasýningu heldur með ósannfærandi frammistöðu gegn sterku og velskipulögðu svissnesku liði Ottmar Hitzfeld. Sigur Sviss var sanngjarn (t.a.m. hefðu bæði Pique og Casillas getað fengið rautt fyrir brot þegar Sviss skoraði) og setur líf í þennan riðil svo um munar. Mætast Spánn og Brasilía í annarri umferð? Leikurinn sem margir spáðu sem úrslitaleik!
Þá var fyrstu umferð riðlakeppninar lokið, umferð fárra marka, vel skipulagðra varna og varkárni.
Það lá því beint við hjá mér að spá 0-0 í leik Suður Afríku og Úrúgvæ, en ekki 0-3 eins og ég gerði fyrir mótið. Hefði betur ekki breytt! Suður Afríka sá drauminn hverfa, Úrúgvæ spilaði vel og Diego Forlan eins og sá sem valdið hefur.
Nú í hádeginu taka Argentínumenn á móti Suður Kóreu. Endurskoðuð spá mín hljóðar upp á eitt eitt jafntefli og byggir á því fyrsta umferðin sé fordæmisgefandi, sem klikkaði svo mjög í leiknum í gær. Mikið vildi ég samt að Messi og félagar rífi þá spá í tætlur.
Nígería tekur svo Grikkland og vinnur þá sanngjarnt 2-0.
Gleðilega þjóðhátíð!!

Ísland á HM!

Posted June 16th, 2010. Filed under fótbolti HM 2010

Ef það er eitthvað sem varnarsnilld þessa móts kennir okkur þá er það sú staðreynd að Ísland á að keppa að því svikalaust og grímulaust að komast á HM með þeirri einföldu leikaðferð að fá ekki á sig mark.
Ég hef auðvitað verið á þessari skoðun í áraraðir, en þegar henni er hreyft koma upp raddir fólks sem vill frekar sjá Ísland gera einhverjar meintar tilraunir til sambabolta, sama þótt tapið verði stórt, því það er svo gaman.
Bullerttta.
Það er reyndar mikill galli að langbesti leikmaður okkar undanfarin ár spilar stöðu sem Ísland á í raun og veru ekki að leyfa sér að vera með mann í. Holan er ekki til í varnartaktinni sem nauðsynleg er.
Annars spáði ég 4-0 í síðasta leiknum í gær, en bjóst sosum alveg eins við 1-0. Var virkilega hrifinn af Norður Kóreu og það verður erfitt fyrir bæði Portúgal og Côteverja að að brjóta þá á bak aftur. Þessi riðill verður kannske aðeins öðruvísi dauðariðill en búist var við!
Og ef að einhver vill halda því fram að Maicon hafi ekki verið að reyna að skora, þá er viðkomandi vinsamlega beðinn um að hætta að vera Englendingur.
Fyrstu tveir leikir dagsins eru heillandi. Hondúras er loksins aftur á HM eftir 28 ára bið og keppir við Chile sem er hugsanlega taktískt mest spennandi lið á HM. Og svo er loksins, loksins, loksins komið að Spáni. Þarf að hafa fleiri orð um það? Ef Spánn – Sviss fer 1-0 eða 0-0 munu fullorðnir menn gráta og syrgja horfna fegurð knattspyrnunar. “Help us XaviIniestaVillaFabregas, you are our only hope!” Fyrst ég er farinn að tengja á Zonal Marking er ágætt að kíkja á umfjöllun þeirra um Spán. Snilldarsíða sem er með frábærar analýsur á flesta leiki.
Spáin: Hondúras – Chile: 0-2; Spánn – Sviss: 3-0

Ekki byrjaði þetta nógu vel hjá Ítölum í gær, en við höfum engar áhyggjur, það er ekki eins og tilvonandi heimsmeistarar hafi ekki áður gert jafntefli í fyrsta leik. Ég var annars bara ánægður með þá, sér í lagi eftir að þeir breyttu úr 4-2-3-1 í 4-4-2, en Lippi hefur ekki verið við eina fjölina felldur hvað varðar leikskipulag undanfarið.
Hin liðin í riðlinum mætast núna í hádeginu og þar kemur enn eitt liðið sem ég hef mætur á. Aðdáun mín á Alsvörtum er vel þekkt, og það er augljóst að ég mun á sama hátt styðja Alhvíta. Mér þykir þó ekki líklegt að þeir ríði feitum hesti frá þessu móti og við sjáum markaleika, Slóvakar vinna 3-0. Því miður. ETA: Nei skollinn hafi það ég hef þetta ekki af mér. Ryan Nelsen verður klettur í vörninni, 3-4-3 taktíkin verður ekki sjálfsmorðstilraun heldur snilld og þetta endar með naumum sigri Slóvaka 2-1
Síðan mætast Côte d’Ivoire (ef ekki má calla þá Ivory Coast í ensku máli, sé ég ekki að við megum nota ‘Fílabeinsströndina’ !) Þar verður spennandi að sjá hvor dettur oftar, Ronaldo eða Drogba, og ekki síður hvort úrúgvæski dómarinn dæmir eitthvað. Ég breyti aðeins spánni minni frá því fyrir keppni, held að Côtar poti inn einu, en Portúgalir skora tvö og hafa þetta af. Glæfraleg spá í ljósi fyrri leikja á mótinu, og sóknarmannsleysi Portúgala!

Kanntu ensku?

Posted June 15th, 2010. Filed under fótbolti grín youtube

Samræmt próf í ensku vorið 2011 verður fólgið í að skilja Jamie Carragher án texta…

Góð byrjun á deginum…

Posted June 14th, 2010. Filed under fótbolti HM 2010

… en hefði betur leyft mér að taka lúr eftir hádegið.
Fór á Hvítu perluna í hádeginu (topp myndvarpi!) og sá Holland þokkalega ferska vinna bug á erfiðum og skipulegum Dönum, eins og ég spáði. Segir kannske ýmislegt um leikinn að flest allir miðjumenn Hollendinga voru valdir menn leiksins af einhverjum miðli. Sjálfur var ég mjög hrifinn af góðri innkomu Eljero Elia, vona að hann fái tækifæri til að byrja inná gegn Japan.
Kom síðan heim og var næstum dáinn úr leiðindum yfir Japan-Kamerún. Samuel Eto’o er ekki kantmaður. Jesús. Hollendingar eiga að vinna bæði þessi lið og hafa leikmennina til að vinna á þeim. Danir eiga sömuleiðis að vinna báða leikina, en gætu strandað á vörnum. Liggur við að mig hlakki ekki til að horfa á þá leiki.
En nú er ég búinn að skipta um skyrtu, FORZA AZZURI! Paragvæ er með sterkt lið og Ítalir hafa ekki verið sannfærandi og í smá mannskapsvandræðum, þannig að þetta gæti farið hvernig sem er, en ég spái 1-0 fyrir Ítölum.
Talandi um 1-0, það fer að verða opinber úrslit þessa móts. Ef leikirnir fara ekki að verða skemmtilegri mjög fljótlega, gæti þetta orðið með leiðinlegri mótum. En það er enn von um breytingar.

Mörk. Plís?

Posted June 13th, 2010. Filed under fótbolti HM 2010

Fyrsti framherjinn skorar og þá er það víti. En Ghana átti þetta fullkomlega skilið og nóg um það.
Næst: Þýskaland – Ástralía. Spáin 2-1 og það yrði þá markahæsti leikur keppninnar. Langar til að breyta í 1-0. Þetta fer að verða svolítið þreytandi þetta markaleysi.

Zzzzchshaha… ha? hvað.

Posted June 13th, 2010. Filed under fótbolti HM 2010

æ afsakið, ég var sofandi…
eða næstum því. Þetta var ekki æði. 8 mörk í sex leikjum, öll skoruð af miðju eða varnarmönnum. Er verið að reyna við Ítalíu’90 metið? Klúðraði spánni, sem ég var reyndar næstum búinn að breyta á síðustu stundu. Hefði betur gert það!
En nú er komið að Serbíu – Ghana. Ghana vantar sinn besta mann, Essien, og Serbía þótti svo líkleg til að koma á óvart síðast en gat svo ekki blautan.
Ég spái 2-0. Fyrir Serbum. Held ég.

Róbert Grín

Posted June 13th, 2010. Filed under fótbolti HM 2010

Þetta var bara Grín!
Enn á ný náði ég réttum úrslitum, en vitlausri markatölu. Ekki slæmt, hlýt að fara að klúðra bráðum. Jafntefli voru næsta sanngjörn úrslit, hvorugt lið virkaði sannfærandi og sköpuðu í raun ekki mikið. Mark Gerrard var mjög fallegt, en vörnin má taka á sig skömm fyrir að skilja eftir galopið svæði.
Capello hlýtur að skipta Joe Hart inn í næsta leik, mistök Robert Green voru bara hræðileg, og skv Independent var hann sá markvörður sem gerði flest mistök sem leiddu til marks í úrvalsdeildinni í vetur, fjögur.
Annars Rooney á ekki heima aftarlega, Gerrard og Lampard eiga ekki heima saman á miðjunni og Englendingar voru helst til agressífir í tæklingunum, gætu lent í spjaldavandræðum.
Bandaríska liðið er mikil liðsheild, en lið sem treystir á framherja frá Hull hlýtur að teljast brothætt. Altidore tók þó Carragher amk einu sinni mjög fallega, hann hefur hraðann með sér.
En hvorki Alsír né Slóvenía eru talin til stórræðanna þannig að nema eitthvað mikið gerist ættu þessi lið að fara áfram, en það verður þá markatalan sem ræður fyrsta og öðru sæti og hvort liðið mætir Þýskalandi.
En Alsír og Slóvenar geta sýnt okkur í fyrsta leik dagsins hvað þau lið geta gert. Ég spái áframhaldandi markaþurrð, Alsír vinnur með einu marki

Hmmmm

Posted June 12th, 2010. Filed under fótbolti HM 2010

Eitt núll fyrir Argentínu. Ekki var þetta nú of sannfærandi. Reyndar bjargaði markvörður Hapoel Tel Aviv Nígeríumönnum nokkrum sinnum í fyrri hálfleik, og Argentína stjórnaði leiknum lengst af en undir lokin hefðu Nígeríumenn getað stolið stigi.
Vitað var að vörn Argentínumanna væri ekki sú sterkasta, og gallarnir sáust. Romero er hins vegar ágætis markvörður eftir gott tímabil með AZ.
Það sem kom mér meira á óvart var að þeir virtust ekki alveg nógu beittir framávið.
Ég þarf síðan að endurskoða spá mína í Nígería – Grikkland, Grikkir eru ekki að fara að taka það. Suður Kórea – Argentína verður mun meira spennandi en við var búist, og síðan gæti Nígería – Suður Kórea orðið úrslitaleikur um að komast áfram.
Þetta verður spennandi riðill.
Annars eru varnarmenn búnir að skora þrjú af fimm mörkum í keppninni hingað til. Ekki er það nú of heillandi, vonum það breytist. Að ekki sé minnst á að meðalmarkatalan hækki svolítið.
Talandi um mörk. Þau verða ekki fleiri í dag, ég spái markalausu jafntefli í leik Englendinga og Bandaríkjamanna. Það er reyndar líka óskhyggja, ég get ekki valið hvoru liðinu ég held minna með. Englendingar reyndar aðeins líklegri til að pota inn einu, enda Wayne Rooney besti maðurinn á vellinum.

Úff hvað Grikkir eru slakir

Posted June 12th, 2010. Filed under fótbolti HM 2010

Fyrsta kórrétta spáin komin í hús, en hefði getað fimm núll. Lítur vel út með “Suður Kórea áfram” spána, en núna er ég virkilega farinn að hlakka til að sjá Argentínu!! Lítur út fyrir að þeir spili með þrjá aftast, tvo vængverði (wing-backs), tvo afturliggjandi miðjumenn og þrjá frammi. Topplið!
Uppfært: Nýjustu tíst benda til 4-3-3. Líst enn betur á það!

Dagur tvö punktur

Posted June 12th, 2010. Filed under fótbolti HM 2010

Eins og allir sannir knattspyrnuaðdáendur bíð ég spenntur eftir leik Suður Kóreu og Grikklands. Það eru nefnilega svona leikir sem HM snýst um. Amk eftir 1982 þegar fjölgað var í 24 lið og ekki síður eftir 1998 þegar fjölgað var í 32. Leikur tveggja liða sem skiptir í raun ekki miklu máli fyrir liðin sjálf, og aðeins sú staðreynd að þetta er úrslitakeppni HM fær mann til að kveikja á sjónvarpinu.
Þetta er kannske aðeins of háðskt, en svona leikir geta amk oft orðið ágætasta skemmtun. Ég spái Suður Kóreu 2-0 sigri þrátt fyrir að Grikkland sé með hörkuskipulagt lið. Ég reyndar spáði þannig að Suður Kórea fari áfram og Nígería verði floppið í riðlinum.
Sem beinir manni beint að öðrum leik dagsins. Það verður spennandi. Getur Argentína nýtt sér stórstjörnurnar sínar? Er Maradona klikkaður þjálfari eða innblástur fyrir sína menn? Geta Nígeríumenn eitthvað? Skiptir máli að keppnin sé í Afríku?
Ég spá 3-1 fyrir Argentínu en býst alveg eins við því að sú spá klikki herfilega.

Stórmeistarajafntefli?

Posted June 11th, 2010. Filed under fótbolti HM 2010 víkingur

Fóru bæði lið inní kvöldleikinn með sömu hugsanir og ég, að liðin myndu eiga auðvelt með hvort tveggja Suður Afríku og Mexíkó og því riði á að tapa ekki þessum leik?
Hvað um það, leikurinn var hrútleiðinlegur, og ef eitthvað var dapurlegra að sjá sóknartilburði Frakka. Hver sendingin af annari fór í vitleysu inn á teig, og Anelka var jafn eigingjarn og alltaf.
En ég held enn að þessi lið fari áfram.
Ég sá allavega ekkert eftir því að missa af síðasta hálftímanum í þessum leik til að fara á Víking – ÍA. Bara djöfull skítt að Víkingur fékk á sig fjórða markið í uppbótartíma á tímabilinu. Verða að taka sig á.

Annað jafntefli framundan

Posted June 11th, 2010. Filed under fótbolti HM 2010

Ég get víst ekki þóst hafa ætlað að spá fyrri leiknum 1-1 og Frakkland – Úrúgvæ 2-0. Þannig að ég sé annað jafntefli dagsins í kortunum. Og það verða Frakkar sem munu hrósa happi yfir því. Allir vita að Diego Forlan skorar eins og að gamni sínu á Spáni, en fróðlegt verðu að vita hvort Luis Suarez getur komið með skotskóna frá Hollandi inn á alþjóðasviðið. Ef svo verður, þá verða Úrúgvæ ein af spútnikþjóðunum.
Sem fyrr segir á ég von á því að þessar þjóðir gangi frá Mexíkó og Suður Afríku þannig að ef sigur fellur öðru hvoru megin gæti það ráðið sigri í riðlinum.

Alltaf að spá jafntefli í upphafsleik

Posted June 11th, 2010. Filed under fótbolti HM 2010

Þetta kennir mér það að spá alltaf jafntefli í upphafsleik.
Mexíkó galt þess dýru verði að nýta ekki færin í fyrri hálfleik, byrjuð síðan alls ekki nógu sannfærandi í seinni hálfleik og fengu síðan þetta líka glæsilega mark á sig úr skyndisókn. Markmaður sem væri hærri en 173cm hefði þó líklega varið þetta.
Mexíkó átti jafnteflið skilið, herfilegt klúður í rangstöðugildru leiddi til jöfnunarmarksins, Rafael Marquez hugsanlega heppinn að hitta ekki boltann eins og hann vildi.
En ég tel litlar líkur á að þessar varnir nái að halda hreinu gegn Frakklandi og Úrugvæ og að þessar þjóðir séu á leið út úr keppninni

Gleðilega hátíð!

Posted June 11th, 2010. Filed under fótbolti HM 2010

Hátíðin er að byrja, ég er búinn að taka til í HM kofanum, og fyrsti gestur kemur kl 2.
Slökustu gestgjafar í sögu keppninnar hefja keppnina. Það er ýmsir að reyna að halda að vuvuzela geðveikin muni fleyta Suður Afríku áfram, en ég hafna þeirri skoðun. Mexíkó eru númeri of stærri, Javier Hernandez kemur inná og skorar:
Suður Afríka 0 – Mexíkó 2

Besta blaðið

Posted June 10th, 2010. Filed under fótbolti HM 2010

Á vísum stað er snjáð og mikið lesið blað. Kápan er dottin af en það lifði það af. Þetta er Kicker WM Sonderheft 1978, keypt á Spáni.
Síðan þá hefur mér verið ljóst hvaða HM sérblað er konungurinn. Og nú er Kicker WM Sonderheft 2010 komið í hús. Það er sem sé allt að verða klárt. Bara eftir að flikka aðeins upp á lúkkið á þessu blessaða bloggi!

Fantasy football

Posted June 10th, 2010. Filed under fótbolti HM 2010

Fyrst smá ímyndaður ofurbolti

og svo ekta ofurbolti.

Já, Spánverjar eru ‘the team to beat’

HM á morgun og síðan vaknar úr dvala

Posted June 10th, 2010. Filed under fótbolti HM 2010

HM byrjar á morgun!
Var að renna í gegnum keppnina með spá og endaði með Úrúgvæ – Argentínu og Holland – Spán í undanúrslitum (Argentína vinnur Brasilíu og Spánn Ítalíu í fjórðungsúrslitunum). I’ll take that eins og maðurinn sagði. Yrði hreinn draumur.
Rétt að benda á Zonal Marking hreint frábær síða sem rýnir í leikskipulag liðanna og The Equalizer sem er með gott stöff.
Meira seinna í dag

HM nálgast

Posted June 2nd, 2010. Filed under fótbolti HM 2010

HM nálgast óðfluga og ætli sé þá ekki rétt að vekja þetta blogg aðeins úr dvala?
Síðast setti ég upp sér blogg (sem ég flutti reyndar inn í þetta þegar ég flutti af blogspot) en ætli það sé ekki óþarfi núna, þetta verður HM blogg á meðan á keppninni stendur.
Annars svolítið leiðinlegt að bloggfall skuli hafa orðið hjá mér. Nú fær maður útrás á facebook og twitter, en það er varla hægt að fletta upp í fortíðinni þar. Það eru reyndar mun fleiri sem lesa það sem þar segir heldur en nokkurn tíma lásu bloggið mitt.
Annars er allt gott af mér svona fyrir þá sem ekki vita, færslan mín frá 26. október 2008 á ágætlega við að hluta, þó að vissulega sé ekki ‘allt nýtt’ því ég er núna bráðum búinn að vinna í ár á sömu hæð og ég vann frá 2000-2004. Fyrirtækið að vísu annað, og starfið öðruvísi og ég sit inni í herbergi en ekki frammi á gólfi.
It’s all good.