Fjögur lið komust áfram í gær en samt byrja ég á að minnast á atvik sem hafði í raun engin áhrif á úrslitin.

Ég hef aldrei séð nokkurn brenna af jafn upplögðu færi og Yakubu. Chris Iwelumo átti held ég gamla metið en það er miklu, miklu erfiðara skot! Ég hefði átt fínan séns að klára þetta! En þetta hafði engin áhrif á úrslit Nígeríu og Suður Kóreu því tveim mínútum síðar kláraði Yakubu víti af stakri prýði og jafnaði 2-2. Lengra komst Nígería ekki, Martins brenndi af kominn einn inn fyrir og Suður Kórea og Argentína komust áfram. Annars voru síðustu 20 mínúturnar í leik Nígeríu og Suður Kóreu fjörugri en allar 70 fram að því í Argentínu-Grikklands leiknum. Það voru þeir hlutar sem ég horði á og ég missti því af fyrstu þrem mörkunum í Nígeríu – Suður Kóreu og báðum mörkum Argentínu!
Eins og leikar stóðu í upphafi voru Argentínumenn og Suður Kórea áfram, en þegar Nígería skoraði gegn Suður Kóreu voru Grikkir komnir í annað sætið. Suður Kórea jafnaði síðan og komst svo yfir og Grikkir þá dottnir út. Það sást ekki á leik þeirra, hann fór aldrei úr öðrum gír. Nígería hysjaði hins vegar upp um sig sokkana, jafnaði sem fyrr segir og og hefðu komist áfram ef þeir hefðu náð að vinna Suður Kóreu en það tókst ekki. Á meðan gengu Argentínumenn frá Grikkjum verðskuldað.
Fyrr um daginn var það franski farsinn sem tók alla athygli. Fjórir leikmenn settir út úr liðinu móti Suður Afríku og það var greinilega ekki nóg, liðið var vonlaust, Suður Afríka spilaði vel og var komið í tveggja marka forystu eftir um hálftíma. Í hinum leiknum nægði jafntefli báðum liðum að komast áfram en það sást ekki á leiknum, enda myndi sigurliðið sleppa við að mæta Argentínu í næstu umferð. Úrúgvæ tók forystuna seint í fyrri hálfleik og þá voru komin þrjú mörk af þeirri fimm marka sveiflu sem Suður Afríka þurfti til að komast áfram. En lengra fór það ekki, Frakkar settu að lokum eitt mark og gerðu útum draum Suður Afríku endanlega og í raun voru það tvö bestu liðin sem komust áfram úr þessum A riðli.
Aftur fjórir leikir í dag og átta lið og í þetta skiptið hafa öll liðin þetta í hendi sér. Ástralía reyndar aðeins á pappírnum, þeir þurfa átta marka sigur til að tryggja sig áfram, ef sigurinn er minni þurfa önnur úrslit að falla með þeim.
Þetta verður því hörkuspennandi dagur! Ég ætla að vera leiðinlegur í spánni, spá eftir bókinni og vel það:
Slóvenía – England 0 – 2
Bandaríkin – Alsír 1 – 0
Ghana – Þýskaland 0 – 2
Ástralía – Serbía 0 – 3